Алматыда әлем чемпиондары марапатталды

Жалпы жүлде қоры 20 миллион теңгені құрады, деп хабарлайды zk.kz.

Бүгін, 15 ақпан күні Испанияда өткен Аликанте-2022 жастар арасындағы бокстан әлем чемпионатының жеңімпаздары мен жүлдегерлері марапатталды.

Қазақстан бокс федерациясының президенті Кеңес Рақышев чемпиондарға және олардың жаттықтырушыларына ақшалай сертификаттар табыстады.

Жалпы жүлде қоры 20 миллион теңгені құраған

«Испанияда еліміздің жастар құрамасы жақсы нәтиже көрсетті. Медальдардың саны мен сапасы бойынша біз үшінші орын алдық. Арада көп уақыт өтсе де, біз жас боксшыларымызды ұмытқан жоқпыз. Біз жастарға сенім артамыз. Болашақта олар ұлттық құрама боксшыларының орнын басады. Әсіресе әйелдер боксындағы нәтижелер ерекше қуантады. Бокс - біздің ұлттық спортымызға айналды. Қазір әуесқой бокста жүріп, атыңды шығаруға болады. Жақсы қаражат таба аласың. Қазақстанның кәсіпқой боксшылары мұндай табысқа кенелмейді десем, қателеспеймін. Барлық боксшыларға, бапкерлер құрамына және біздің жеңістеріміздің жаршысы - БАҚ өкілдеріне алғыс айтамын», - деді Кеңес Рақышев.

Осылайша, Федерация президенті әлем чемпиондары Элина Базарова (54 кг) мен Бақыт Сейдішке (66 кг) 3 миллион теңгенің сертификаттарын берді.

Күміс жүлдегерлер Нұрбек Мурсал (67 кг) мен Дәулет Тулемисов (75 кг) 1,5 млн. теңгеден алды.

Қола жүлдегерлер Гүлназ Бурибаева (48 кг), Әсем Танатар (63 кг) және Әсел Тоқтасын (+81 кг) 1 миллионға ие болды.        

Жеңімпаздардың жеке бапкерлері Нұрбота Сейітбек пен Бағлан Омарбековке 500 мың теңгеден берілді. Мұндай марапаттар жастар құрамасының басқа да бапкерлерін ынталандыра түседі деп ойлайды ҚБФ өкілдері.

Жалпыкомандалық есепте Қазақстан құрамасы Ұлыбританиямен бірге үшінші орынды бөлісті. Екінші орында Үндістан болса, Өзбекстан әлем чемпионатының үздік құрамасы атанды.