65 жастағы Димаштың Швейцариялық жанкүйері Қазақстанды көруге арнайы келген

Ол қазақ тілінде блог жүргізеді және қазақ мәдениетін белсенді зерттеп жүр.

Эстер Ульман Швейцарияның Берн қаласында тұрады. Екі жылдан бері ол қазақ тілін үйреніп, әлеуметтік желілерде қазақ тілінде блог жүргізіп келеді. Оның қазақ мәдениетіне деген сүйіспеншілігі Димаштың әндерінен басталса керек.

«Мен Димашты алғаш «America' s got talent» шоуынан көрдім. Мен оның Фан-клубтарын Facebook-те іздеп тауып алдым, жазылдым. Және сол жерден қазақ тілі бойынша 5 тегін сабақ ұсынатын постқа тап болдым. Қазақ тілін меңгергім келетінін бірден түсіндім. Сосын керемет мұғалім тауып алдым, біз бірге Оңтүстік Американың көңілді тобына айналдық (Димаштың жанкүйерлері = Dears)», - деп Эстер ерекше ықыласпен әңгімеледі.

Бұл оның сүйікті әншісінің отанына екінші рет келуі. Алматыда бұл жолы оны қазақстандық оқырмандары, достары қарсы алды. Біз де мерекелік дастарханға қосылып, онымен сұхбаттасуды ұйғардық.

- Димаштың әні, Қазақ тілі, ел туралы алғашқы әсерлеріңіз?

- Мен, әрине, оның алғашқы әнінен бастап дауысына таң қалдым! Бірақ мен Youtube-те Димашты бақылай бастағанда, сұхбаттарды тыңдай бастағанда, оның құндылықтары, отбасы және қазақ мәдениеті туралы біле бастағанда, сіздірдің елге деген қызығушылық арта түсті. Менің алғашқы сапарым қыркүйекте Алматыға концерт болды. Оған дейін Димашты Дубай мен Прагада тыңдадым..... бірақ Алматыдағы концерттің мен үшін ерекше болды! Мен Димашқа оның дауысы үшін ғана емес, оның жалпы өнері үшін, ең бастысы, оның құндылықтары үшін, әрқашан өзінің құндылықтарын қалай білдіретіні, барлығына: отбасына, достарына, мұғалімдеріне, фандомына деген ризашылығы мен құрметіне тамсанамын.....

- Қазақ тілін үйрену сіз үшін қаншалықты қиын немесе оңай?

- Өте қиын. Бұл мен үйренетін алғашқы «латын емес» тіл.... Мен білетін басқа тілдермен еш ұқсастығы жоқ (неміс, француз, испан, итальян, ағылшын). Мен 65 жастамын, кейде қазақ тілінің көптеген жалғауларын еске түсіруге тырысқанда миым өте қиналам!!

- Сізге қазақ тілі мен мәдениетін үйренуге кім көмектеседі?

- Мен Ирина Вейгерден дәріс аламын. Ол – Аргентинаның Росарио қаласында тұратын Қазақстанның құрметті консулы. Алматыда дүниеге келген және 20 жасында отбасымен Аргентинаға көшіп келген. Ол тамаша оқытушы, оқушылармен сабақты өте көңілді өткізеді және біз әрқашан Димаш пен қазақ мәдениеті туралы пікір алмасамыз. Менің жеке мұғалімім бар, есімі – Әділет Туло, студент. Әділет менің Instagram және TikTok парақшаларымды жүргізуге көп көмектеседі. Ал бұл өз кезегінде оқырмандарыммен жақсы қарым-қатынас жасауға көмектеседі. Әрине, менің барлық қазақ достарым маған сұрақтар туындаған кезде көмектеседі!

 Қазақ халқының қонақжайлылығы таң қалдырады! Мен өзімді өте құрметті қонақ сияқты сезіндім және кездескендердің бәрінен көп қолдау алдым. Маған ықылас білдіргендердің бәріне өте ризамын. Адамдармен танысу – бұл маған өмір сыйлайтын керемет сыйлық, осы үшін де және сіздердің әрқайсыларыңыздан үйренгенімнің бәрі үшін де ризамын! Қазақ тағамдары дәмді, кез келген себеппен шай ішу мәдениеті мені баурап алды.....біз қазақ достарымызбен бірге отырғанда, шай ішкенде және сөйлескенде уақыт баяулайтын сияқты.

- Сіздің достарыңыз сіздің қазақ тіліндегі блогыңыз туралы не айтады?

- Эстердің тағы бір ерсі қылықтары..... жоқ, мен қалжыңдаймын! Менің достарым өте ашық болғаны үшін бақыттымын. Олардың бірі маған Антальядағы концертке қосылады. Өкінішке орай, Швейцарияда фандом әлі де аз.