Полигондағы той: Маңғыстауда ерекше фотосессия ұйымдастырылды

Авторлар табиғатты құрметтеуге шақырады, деп хабарлайды Zerkalo Lada.kz сайтына сілтеме жасап.

Эколог Нұркен мен фотограф Нұрбол Салиев адамзат табиғатқа немқұрайлылықпен қарауды тоқтатпаса, 2050 жылы үйлену тойлары полигондарда өтеді деп есептейді.

Нұркен Салиев қазір экокәсіпкер ретінде қалдықтарды жинап, сұрыптаумен айналысады. Оның ағасы – фотограф Нұрбол Салиев қаладағы полигонда модельдерді алып, фотосессия жасаған.

Ағайындылар адамдарды пластикті пайдалануды азайту және қайта өңдеуді бастау туралы ойлануға шақырады.

«Біз мұнымен тоқтамаймыз. Идеялар көп, халқымыздың экологиялық мәдениетін көтергіміз келеді», – дейді Нұркен Салиев.

Айта кетерлігі, Маңғыстау облысы үшін қоқыс мәселесі өте өзекті. Сайын Шапағатов ауылы әкімдігінің мәліметінше, олардың қызметкерлері небәрі екі айдың ішінде жағалаулардан 250 тонна қоқыс жинаған. Ал Ақшұқыр ауылындағы жағалаудан коммуналдық қызметкерлер аптасына бір тонна қоқыс шығарады.

Фото: lada.kz