Заң консультацияларын "Е-Zan Komegi"қосымшасы арқылы алуға болады

«Е-Zan Komegi» қосымшасы арқылы заңгерлік кеңес алуға болады. Бұл туралы Орталық коммуникациялар қызметінің брифингінде ҚР Әділет вице-министрі Бекболат Молдабеков мәлімдеді.

Вице-министр Әділет министрлігінің цифрландыру жобаларын іске асыру барысы туралы айтты.

««Е-Zan Komegi» жобасы адвокаттардың, заң консультанттарының қызметін, процеске қатысушылармен және басқа да мүдделі тараптармен онлайн-өзара іс-қимылды автоматтандыруға арналған. Яғни, біз азаматтар мен адвокаттарға көмектесетін ақпараттық жүйені әзірледік. Бұл өзіне жүктелген адамдарға қандай адвокат қандай көмек көрсеткенін тіркейтін жүйе. Сондай-ақ, қазір «заң кеңесшілері»деген ұғым бар. Осыған байланысты, біз бұл жүйені бірінші тоқсанда осы жүйе арқылы, мобильді қосымша арқылы заңгерлік кеңес алу үшін пысықтап жатырмыз", – деді Б.Молдабеков.

Спикер биометрия арқылы барлық қызметтерді алуға әлемдік практика бар екенін атап өтті. Сондықтан авторизация мен қол қою Face ID арқылы жүзеге асырылады деп жоспарлануда. Жүйеде азаматтардың таңдауы болуы үшін адвокаттар мен заң кеңесшілерінің рейтингі ұсынылады. Азаматтарға ыңғайлы болу үшін 1414 жалпы байланыс орталығы қосылған, оған қоңырау шалуға және заңгерлік кеңес алуға болады.