Міне, жаңа бұрылыс: Петропавлда қоғамдық көлікте жол жүру қымбаттайды

Петропавлда Алматыдан кейін қоғамдық көлікте жол жүру қымбаттайды, деп хабарлайды Zerkalo.

Қоғамдық көлікте жол жүруге арналған жаңа тарифтерді Кеңестің өткен сессиясында Петропавл қалалық мәслихатының депутаттары бекітті. Енді жол жүру құны қолма – қол ақшасыз есеп айырысу кезінде 100 теңгені, ал қолма-қол ақшамен 170 теңгені құрайтын болады. Депутаттар жаңа тарифтердің күшіне ену күнін әлі атаған жоқ, өйткені мәслихаттың бұл Қаулысы қажетті заң рәсімдерінен өтуі тиіс.

"Нормативтік-құқықтық актінің жобасы әділет органдарында тіркелуді талап етеді. Бұл шамамен бір-екі аптаға созылады. Осы уақыттан бастап жаңа тариф жұмыс істей бастайды", - деп атап өтті қала әкімінің орынбасары Әділбек Әубәкіров.

Әкімдікте қолма-қол ақшамен және қолма-қол ақшасыз есеп айырысумен төлеудегі елеулі айырма жол жүрудің электрондық төлеміне көшуге ынталандыру шарасымен түсіндіріледі. Сонымен қатар, облыс орталығындағы тарифтер 2017 жылдың наурыз айынан бастап қайта қаралған жоқ.

Фото: pkzsk.info