Алматы әкімдігінің ғимаратын 2023 жылдың жазына дейін қалпына келтіру жоспарлануда

"Қазақстан Республикасы Үкіметінің резервінен қаражат бөлу туралы" қаулының жобасы ашық НҚА сайтында жарияланды.

Құжатқа сәйкес, әкімдік ғимаратын қайта жаңарту осы жылдың мамыр айында аяқталады деп жоспарлануда. Ал құрылысқа 7 миллиард теңгеден астам қаражат жұмсалады.

"Қазақстан Республикасының Индустрия және инфрақұрылымдық даму министрлігіне 2023 жылға арналған республикалық бюджетте шұғыл шығындарға көзделген Қазақстан Республикасы Үкіметінің резервінен Алматы қаласының әкімдігін  Алматы қаласы әкімдігінің ғимараттарын қайта жаңарту үшін нысаналы даму трансферттері түрінде аудару үшін 7 010 773 250 (жеті миллиард он миллион жеті жүз жетпіс үш мың екі жүз елу) теңге сомасында қаражат бөлінсін", - деп жазылған құжатта.

Құрылыстың мақсаты ретінде қала аппаратының сапалы және уақтылы жұмыс істеуі үшін заманауи стандарттарға сәйкес қалпына келтіруді көрсетеді.

Ал қала әкімдігі 2023 жылғы 1 желтоқсанға дейін қаражаттың мақсатты пайдаланылуы бойынша есеп беруі тиіс.