Астанада Тоқаевтың Блинкермен кездесуі өтті

Америкалық дипломат Қазақстандағы саяси және экономикалық өзгерістерге жоғары баға берді.

Бүгін, 28 ақпанда елордада Қасым-Жомарт Тоқаев Қазақстанға ресми сапармен келген АҚШ Мемлекеттік хатшысын қабылдады, деп хабарлайды Ақорда.

Америкалық дипломатты құттықтай отырып, Қазақстан Президенті дипломатиялық қатынастар орнаған сәттен бастап Қазақстан мен АҚШ екіжақты және көпжақты форматтарда үлгілі өзара іс-қимыл жасағанын атап өтті.

«Сіздің сапарыңыз біздің стратегиялық ынтымақтастығымызды құруға қосымша серпін беру тұрғысынан өте маңызды. Бізде қауіпсіздік, энергетика, сауда және инвестиция сияқты стратегиялық маңызды салаларда өте жақсы және сенімді ұзақ мерзімді серіктестіктер бар. Сондықтан біз осы ынтымақтастықты одан әрі дамытуға дайынбыз. Осы мүмкіндікті пайдалана отырып, мен Америка Құрама Штаттарының тәуелсіздігімізді, аумақтық тұтастығымызды және егемендігімізді үнемі және берік қолдағаны үшін ризашылығымды білдіргім келеді, – деді Президент.

Экономикалық ынтымақтастық туралы айта келе, Мемлекет басшысы АҚШ жалпы инвестиция көлемі 62 млрд доллардан асатын Қазақстанның ірі инвесторларының бірі болып табылатынын атап өтті.

Қазақстан көшбасшысы С5+1 форматындағы ынтымақтастықты кеңейту жөніндегі Америка Құрама Штаттарының күш-жігерін құптап, Астанада Орталық Азия елдері мен АҚШ сыртқы саяси ведомстволары басшыларының кездесуін өткізудің маңыздылығын атап өтті.

Өз кезегінде АҚШ Мемлекеттік хатшысы Қасым-Жомарт Тоқаевқа қонақжайлылық көрсеткені үшін алғысын білдіріп, оған АҚШ президентінің жылы лебізін жеткізді.

«Екіжақты деңгейде 30 жылдан астам уақыт ішінде қол жеткізген елеулі табыстарды дамыту, серіктестігімізді тереңдету және нығайту маңызды. Соңғы жылдары ғана біз осы бағытта жаңа маңызды жетістіктерге қол жеткіздік. Бізді берік қарым-қатынас байланыстырады және олар тек күшейе түседі. Біз бұл курсқа міндеттіміз. Сонымен қатар, біз сіздерге және сіздің командаңызға бүгін Астанада Орталық Азия серіктестерін жинағаныңыз үшін алғыс айтамыз.

Біз әріптестеріміз – Сыртқы істер министрлерімен бірге аймақты біріктіру, неғұрлым берік байланыстар жасау, неғұрлым тығыз қарым – қатынас жасау, практикалық нәрселерге назар аудару бойынша одан да нақты жұмысқа қатысамыз деп үміттенемін. Бұл Орталық Азия халықтары мен Америка Құрама Штаттарына да пайдалы болады деп ойлаймын. Біз ең жоғары деңгейде өзара әрекеттесуге ниеттіміз. Мен осында болғаныма және ынтымақтастығымызды нығайтуға өз үлесімді қосқаныма өте қуаныштымын», – деді Энтони Блинкен.

Сонымен қатар, америкалық дипломат Қазақстандағы саяси және экономикалық өзгерістерге жоғары баға берді.

Әңгіме соңында Қасым-Жомарт Тоқаев АҚШ президенті Джо Байденге ізгі тілектерін жеткізді.

АҚШ Мемлекеттік хатшысының сапары 24 ақпанда белгілі болды. Бұған дейін Энтони Блинкен Қазақстанның Сыртқы істер министрі Мұхтар Тілеубердимен кездесті.