Қазақстанның жаңа картасын жасауға қанша ақша жұмсалды

Геодезия және картография комитетінің төрағасы Қажымұқан Бекмұқашев ОКҚ брифингінде Қазақстанның жаңа картасын жасау қанша тұратынын айтты, деп хабарлайды Zerkalo.

Қажымұқан Бекмұқашев елімізде үш жаңа облыс құрылғанын ескере отырып, Қазақстанның жаңа картасын жасауға бюджеттен жұмсалған нақты соманы айтты.

"Жалпы Қазақстанның әкімшілік картасын, алты облысты және облыс орталықтарының схемаларын жасауға 56 млн теңге жұмсалды. Егер Қазақстан картасын бөлек алсақ-бұл 10 млн теңге. Жалпы республикалық бюджеттен 56 млн теңге жұмсалды", - деді спикер.

Естеріңізге сала кетейік, 2022 жылғы 8 маусымда Мемлекет басшысы Қасым-Жомарт Тоқаевтың Қазақстанда үш жаңа облыс құру туралы Жарлығы ресми түрде күшіне енді: Абай, Ұлытау және Жетісу – Жаңа өңірлердің әкімшілік орталықтары тиісінше Семей, Жезқазған және Талдықорған болды.

Сондай-ақ, өткен жылдың 4 мамырында Алматы облысының әкімшілік орталығы Талдықорғаннан Қонаев қаласына көшірілгенін атап өтеміз. Ал бір күн бұрын Қапшағай қаласы жаңа атау алды-Қонаев.