Визалық режимді жеңілдетуді Қазақстан мен Еуроодақ талқылайды

Қазақстан премьер-Министрінің орынбасары - Сыртқы істер министрі Мұрат Нұртілеу Брюссельде ішкі істер жөніндегі Еуропалық комиссар Ильва Йоханссонмен кездесті, деп хабарлайды Zerkalo.

Келіссөздердің қорытындысы бойынша Тараптар Қазақстан азаматтары үшін визалық режимді жеңілдету туралы ресми консультацияларды бастау туралы уағдаластыққа қол жеткізді.

"Мұрат Нұртілеу Еуропалық комиссарға Қазақстанның визалық саясаты, азаматтарымыздың жоғары адами капиталы және Қазақстан тарапынан Еуроодақ үшін көші - қон тәуекелдерінің жоқтығы туралы, сондай-ақ Қазақстан Үкіметі қабылдаған заңсыз көші-қонға қарсы күрестегі шаралар және осы бағыттағы жұмыстың басқа да маңызды аспектілері туралы хабардар етті", - делінген республика Сыртқы істер министрлігінің хабарламасында.

Ильва Йоханссон Еуроодақ Қазақстанмен өзара тиімді ынтымақтастықты одан әрі нығайтуға мүдделі екенін және Тараптардың азаматтары арасындағы байланыстарды кеңейтуге ұмтылатынын мәлімдеді.

"Еурокомиссардың пікірінше, Қазақстан мен ЕО арасындағы стратегиялық әріптестіктің маңызды көрсеткіштерінің бірі тұрақты мәдени-гуманитарлық алмасуды қолдау болып табылады", - деп атап өтті ҚР СІМ.