Оқиға: АҚШ Мемлекеттік хатшысының Қазақстанға сапары және БҰҰ дауыс беруі

Біріккен Ұлттар Ұйымының Бас Ассамблеясындағы дауыс беру және АҚШ Мемлекеттік хатшысы Энтони Блинкеннің Қазақстанға алдағы сапары – өткен түннің басты әлемдік оқиғалары.

Ресейдің Украинаға әскери басып кіруінен бір жыл өткен соң БҰҰ Бас Ассамблеясы Ресейдің Украинаға қарсы соғысына арналған арнайы сессиясында көпшілік дауыспен (73%) Украинада жан-жақты, әділ және тұрақты бейбітшілік орнату туралы қарарды қабылдады.

БҰҰ Бас ассамблеясы Ресейді Украина аумағынан әскерін шығаруға шақырды. БҰҰ-ның 141 мүшесі қарарды қолдап, 7-і қарсы, 32-сі қалыс қалды.

Қазақстан Бас Ассамблеяда дауыс беруден қалыс қалды, шығыстағы көршілеріміз Қытай, сондай-ақ оңтүстіктегі көршілері Қырғызстан мен Өзбекстан да осындай дауыс берді. Қалыс қалған басқа мемлекеттер арасында Үндістан, Армения, Тәжікстан және Иран бар.

Әрине, резолюцияға Ресейдің өзі және оның одақтасы Беларусь, сондай-ақ Сирия, Солтүстік Корея, Эритрея, Никарагуа және Мали қарсы дауыс берді.

Кейбір елдер (олардың 13-і ғана), оның ішінде Түркіменстан, Әзірбайжан және Венесуэла бұл қарарға мүлде дауыс берген жоқ.

Бұл ретте АҚШ Мемлекеттік хатшы Энтони Блинкеннің еуропалық турнесі аясында 28 ақпанда Қазақстанға алғашқы ресми сапарын жасайтынын растады.

Энтони Блинкен екіжақты ынтымақтастықты тереңдету мақсатында жоғары лауазымды қазақстандық шенеуніктермен кездесіп, одан кейін Орталық Азиядағы барлық мемлекеттердің сыртқы істер министрлерімен С5+1 министрлерінің кездесуіне қатысатыны белгілі.

Сапар барысында Блинкен АҚШ-тың Орталық Азия елдерінің тәуелсіздігіне, егемендігі мен аумақтық тұтастығына және жалпы жаһандық мәселелерді шешуде аймақпен ынтымақтастығына адалдығын қуаттайды, делінген АҚШ Мемлекеттік департаментінің мәлімдемесінде.

Сонымен қатар, С5+1 министрлерінің кездесуінде АҚШ, Қазақстан, Қырғызстан, Тәжікстан, Түркіменстан және Өзбекстан арасындағы экономикалық, энергетикалық, экологиялық және қауіпсіздік саласындағы ынтымақтастықты нығайту мәселелері талқыланады.