Неліктен Қазақстан Түркі инвестициялық қорына 100 млрд теңге салады?

Қазақстан Түркі инвестициялық қорына кірді. Елімізде 100 млрд теңге көлемінде жарна төленуі тиіс. Қорды құру туралы келісімге Әзірбайжан, Қырғызстан, Түркия және Өзбекстан да қол қойды.

Халықаралық қаржы ұйымына қатысу Қазақстан экономикасына, бизнеске, сондай-ақ қазақстандықтардың әлеуметтік өміріне қалай әсер ететінін бізге Алматы ҰКП түсіндірді.

«Қиын экономикалық жағдайды ескере отырып, Қазақстан үшін жаңа нарықтар, логистикалық жолдарды кеңейту қажет. Ал инвестициялық қор өңірішілік сауданы дамытуға бағытталған. Осындай Халықаралық экономикалық шешімдердің арқасында отандық бизнес үшін жаңа мүмкіндіктер ашылады. Ал бизнестің рентабельділігі-қоғамның, мәдениеттің өркендеуі», - деп жазады Алматы қаласы Кәсіпкерлер палатасының төрағасы Әуез Таймбетов.

Таймбетовтың айтуынша, Түркі инвестициялық қорын құру туралы келісім елдер арасындағы экономикалық қатынастарды одан әрі нығайтуға септігін тигізеді.

«Бізде ортақ мәдениет пен ортақ мүдделер бар. Өңірлік ортақ нарықты құру, бірлескен инвестициялық жобаларды құру қатысушы елдердің экономикаларын және кәсіпкерлердің іскерлік байланыстарын дамытуға оң әсерін тигізеді», - деп қорытындылады Таймбетов.

Қор келісімге қол қойылған күннен бастап 20 жыл бойы жұмыс істейді. Қандай бағыттар басымдыққа ие болатыны әлі белгісіз.