Нью-Йоркте Түркиядағы зілзаланың құрбандарын еске алды

Түрік қауымдастығының өкілдері Таймс-сквер алаңына жиналды, деп хабарлайды Анадолу. Дүйім жұрт Джордж Коханның ескерткішінің алдына Түркия мемлекетінің жалауларын қойып, шам жағып, қайтыс болған отандастарын еске алу ретінде гүл шоқтарын қалдырған.

Бұл шараға кәсіпкерлер, студенттер және АҚШ-та тұратын этникалық түріктер мен шетелдіктер келген.

Жиналғандар бір минут үнсіздікпен қаза тапқандарды еске алды. Түркия Республикасының Әнұраны шырқалды. Сондай-ақ жойқын жер сілкінісі салдарынан зардап шеккендерге шұғыл көмек көрсетуге үндеу тасталды.

Естеріңізге салсақ, дүйсенбі, 6 ақпанда Түркияның оңтүстік-шығысында магнитудасы жеті балдан асатын екі жер сілкінісі болды (жергілікті уақыт бойынша 04.17 - де – 7,7 балл және 13.24-те-7,6 балл). Салдарынан қаза тапқандар саны 30 мыңнан асты.

Президент Режеп Тайып Ердоған Түркияда апат құрбандары үшін жеті күндік Жалпыұлттық аза тұту туралы жариялады. Түркияның мемлекеттік тулары бүкіл ел бойынша төмендетілді.