Алматыда дзюдодан Бекет Махмұтовты еске алуға арналған турнир өтеді

Татамиге 2006-2007 жылы туған дзюдошылар, сондай-ақ олардың аға жолдастары (2003-2005 ж.т.) шығады.

Бекет Махмұтовты еске алуға арналған турнир Халықаралық дзюдо федерациясының (IJF) ресми күнтізбесіне енгізілген және кадеттер мен жастар арасындағы Азия кубогы мәртебесіне ие.

Жарыстар 7-9 сәуір аралығында Алматыда Балуан Шолақ атындағы спорт сарайында өтеді.

Турнирге Қазақстан, Өзбекстан, Тәжікстан, Түркіменстан, Қырғызстан, Грекия, Гонконг, Грузия, Моңғолия және АҚШ-тан 400-ден астам спортшы қатысады деп күтілуде. Медальдардан бөлек, турнирдің чемпиондары мен жеңімпаздары рейтингтік ұпайларға ие болады. Мәселен, турнир жеңімпазы 100 ұпай, күміс жүлдегер 60 ұпай, қола жүлдегер атанған дзюдошы әлемдік рейтингте 40 ұпаймен марапатталады.

Махмұтов Бекет Сапабекұлы 2009-2012 жылдар аралығында Қазақстан дзюдо федерациясын басқарды, сонымен қатар Азия дзюдо одағының вице-президенті қызметін атқарды. Айта кетейік, байқау биыл алтыншы рет өткізілмек.