Түркиядағы жер сілкінісі. Бұл уақытта не белгілі

Түркияда күшті жер сілкінісі болды. Жер асты дүмпулері жалғасуда.

Астана уақыты бойынша сағат 17:00-дегі мәлімет бойынша 912 адам қайтыс болды. 5385 адам жарақат алған.

Түркия президентінің айтуынша, елде жер сілкінісі салдарынан 2818 ғимарат қираған, сондықтан қаза болғандардың нақты санын анықтау қиын.

Ердоған бұл оқиғаны 1939 жылдан бергі ең күшті жер сілкінісі деп атады.

АҚШ Геологиялық қызметінің мәліметі бойынша, ең күшті жер сілкінісі жергілікті уақыт бойынша сағат 04:17-де болды, көзі Түркияның оңтүстік-шығысындағы Газиантеп қаласының маңында 17,9 км тереңдікте болған.

Түркияның Төтенше жағдайлар және Апаттар басқармасы хабарлағандай, негізгі жер сілкінісінен кейін 40-тан астам жер сілкінісі болды.

Қазақстан Президенті Қасым-Жомарт Тоқаев Түркия Президенті Режеп Тайып Ердоғанға көңіл айту жеделхатын жолдады.

«Түркия Республикасында болған күшті жер сілкінісі салдарынан көп адамның қаза тапқаны туралы хабарды қатты қайғырдым. Осы қиын сәтте Қазақстан халқының атынан және жеке өз атымнан қаза болғандардың отбасыларына, сондай-ақ бүкіл бауырлас түрік халқына көңіл айтамын», - делінген жеделхатта.

Президент сондай-ақ Қазақстанның Түркияға тиісті көмек көрсетуге дайын екенін мәлімдеді.

Қазір Сыртқы істер министрлігі мен Төтенше жағдайлар министрлігі арқылы Түркия билігімен байланыс орнатылды. Жақын арада Түркия үкіметінің тапсырысы бойынша қазақстандық құтқарушылар мен дәрігерлер зардап шеккен аймақтарға ұшады.