Михаил Саакашвили жансақтау бөліміне ауыстырылды

Анасы кеше түнде есінен танып, қызуы 39 градусқа дейін көтерілгенін айтты.

Оның баспасөз хатшысы Георгий Чаладзенің айтуынша, қазір қамауда отырған Грузияның экс-президенті Михаил Саакашвили денсаулығының нашарлауына байланысты жансақтау бөліміне ауыстырылды, деп хабарлайды «Азаттық» радиосы.

Бұл ретте емхана директоры Нино Надирадзе өзін ешқайда ауыстырмағанын, әлі де палатада жатқанын алға тартады.

Таңертең экс-президенттің анасы Джули Аласания саясаткердің түнде есін жоғалтқанын, дене қызуы 39 градус шамасында болғанын айтты. Бұл туралы «Новости-Грузия» агенттігіне сілтеме жасап хабарлады.

Саакашвилиге бірнеше күн бұрын коронавирус диагнозы қойылған. Содан кейін клиника реанимацияға көшудің қажеті жоқ екенін және аурудың жеңіл түрінде екенін айтты. Mtavari телеарнасының хабарлауынша, Саакашвилидің жаңа коронавирус сынағы теріс нәтиже көрсеткен.

Биылғы жылдың басында Грузияда және тағы 20-дан астам елде Саакашвилиді қолдау мақсатында пикеттер өтті. Қатысушылар саясаткерді босатуға және ЕО-да емделуге мүмкіндік беруге шақырды. Кейбір белсенділер Грузияның қазіргі билігін Саакашвилидің өліміне ұмтылды деп айыптады.

Украина азаматтығын алған Грузияның экс-президенті елге жасырын оралған соң 2021 жылдың күзінде Тбилисиде қамауға алынды. Бұл кезде ол қызметтік өкілеттігін асыра пайдаланды деген айыппен сырттай – 6 жылға бас бостандығынан айырылған болатын. Саакашвили денсаулығының нашарлауына байланысты Тбилисидегі азаматтық емханаға ауыстырылды. Саясаткердің өзі және оның жақтастары жағдайдың нашарлауына улану себеп болуы мүмкін екенін алға тартады. Грузия билігі мұндай тұжырымдарға ешқандай дәлел жоқ деген уәж айтады.

Михаил Саакашвили қылмыстық қудалауды саяси астарлы деп атайды.