Түркияда үйінділердің астынан саңырау және мылқау адам кездейсоқ құтқарылған

Думан Қамзин – Түркияға іздеу-құтқару жұмыстарына барған ҚР ТЖМ құтқарушыларының бірі. Ол өз әріптестерімен Нұрдағы қаласында жұмыс атқарған. Үйінділердің астында жатқан және көмекке шақыра алмаған адамды  бірінші болып тапқан да ол.

Думан әріптесімен бірге алғашында әйелдердің даусын естіп, соларды іздеуге аттанған.  Үйінділердің астына түсу үшін олар құралдары мен рациясын тастап кетуге мәжбүр болған. Бірақ думанның өзі айтқандай, саңылау тым кішкентай болып шығып, әріптесі құралдарды сырттан әкелуді өтінеді. Шығып келе жатып, ол тағы бір өткелді көреді де, тексеріп көрмек болады.

«Мен барлық жерде тексердім. Кенеттен әлдекімнің терең демалғанын естідім. Алдымен мен оны жанымдағы әріптесім деп ойладым. Өйткені біз шаршаймыз, тізерлеп жүреміз, құралдарымыздың салмағы 15-20 келі. Мен одан «демалған сен бе?» сұрадым, ол «жоқ» деді. Біз тынысымызды тартып тұрдық, сосын әлгі дауысты тағы да естідім. Аяқтың стынан шықты. Қаза бастадым да, темір есікке тап болдым. Оны жұлып алдым, астында тірі адам жатыр екен», - дейді Думан.

Жәбірленуші саңырау және мылқау болып шыққан. Оны қирандылардың астынан шығаруға шамамен бір сағаттай уақыт кеткен. Қазақстандық құтқарушы бөліскендей, адамды табу бөлек, ал шығару – басқа.

«Біз оның естімейтінін және сөйлемейтінін де білмедік. Ол бізге саусақпен бірдеңе түсіндіргісі келді, бірақ біз оның саусағы сынған деп ойладық. Біздің алдымызда жергілікті құтқарушылар қирандыларды акустикалық аппаратпен тексеріп үлгерді. Бұл адам оны да естігемеген ғой сонда», - дейді Түркиядан оралған қарағандылық құтқарушы.