Тағы 78 қазақстандық Түркиядағы апат аймағынан елге оралды

Елшілік 200-ге жуық қазақстандықтың орналасқан жерін біле алды, деп хабарлайды ҚР СІМ ресми өкілі Айбек Смадияров.

«Инфрақұрылымы жойылған, апатты жағдайды және тұрғын үйлердің толық қирауын ескере отырып, біздің дипломаттарымыздың көмегімен отандастарымызды қауіпсіз жерлерге — Анкара мен Ыстамбұлға көшіру үшін автобустар ұйымдастырылды. Тамақтану және уақытша баспана қамтамасыз етілген. Қаражаты жоқ кейбір азаматтарға Қазақстанға дейін әуе билеттерін сатып алуға жәрдем көрсетілді", – деді Смадияров министрлікте өткен апта сайынғы брифингте.

Апат аудандарынан отанына оралғысы келген 78 отандасты гуманитарлық әуе кемелері Астана және Алматы қалаларына жеткізді.

СІМ мен жергілікті әкімдіктердің көмегімен олар үшін көлік ұйымдастырылып, тұрғын үйге мұқтаж азаматтар Алматы және Астана қонақ үйлеріне орналастырылды.

Осы борттармен Қазақстанға Қазақстандықтардың Отанына оралған отбасылардың мүшелері болып табылатын 24 Қырғызстан азаматы және 5 Түркия азаматы жеткізілді.

Сондай-ақ, Айбек Смадияров бұрын құтқарушылар тапқан қазақстандық Сабина Мамадьярованың жағдайы туралы хабарлады. Ол бірден Адана қаласындағы Цейхан ауруханасына жеткізілген.

«Зақымдалған қолына операция жасады. Біздің Антальядағы Бас консулымыз оған өзі барып, емдеуші дәрігермен сөйлесіп қайтты. Ол әлі дәрігерлердің бақылауында, жанында туыстары бар", – деді Смадияров.