Британдық басылым Қазақстанның туристік әлеуетін жоғары бағалайды

Condé Nast Traveller Британдық басылымы The most Breathtaking Places to Visit in Kazakhstan («Қазақстанда баруға болатын ең қызықты орындар») атты жеке мақаласын арнады. Онда авторлар еліміздің ібай мәденеті мен табиғатын атап өтіп, еліміздің туристік қалалары мен аймақтарын сипаттайды. Бұл туралы 20 ақпанда мәдениет және спорт министрлігі хабарлады.

«Ғаламшарымыздың тоғызыншы ірі елі бола отырып, Қазақстанның көрікті пейзаждарға - тауларға, мөлдір көлдерге, ну ормандарға және өнер мен мәдениетке толы ежелгі қалаларға бай болуы ғажап емес. Біз ұзақ уақыт бойы көлеңкеде болып келген әлемнің осы көрікті бұрышындағы ең жақсы бағыттарды жинадық. Олардың әрқайсысы бөлек сапарға тұрарлық», - деп жазады басылым.

Мақалада Алматы, Бурабай, Астана, Маңғыстау, Түркістан, Шығыс Қазақстан мен Ұлытау сипатталған.

Вице-министр Ержан Еркінбаев әлемдік БАҚ елімізге көбірек көңіл бөлетінін атап өтті.

"Өткен аптада ғана Қазақстан Үндістаннан келген туристер үшін ең трендті бағыт болып танылды. Бұған дейін Қазақстан танымал Curly tales сайтының нұсқасы бойынша қолжетімді демалыс бойынша ТОП-10 елдің қатарына кірді. Әлемдік басылымдар Қазақстанға барған сайын назар аударып, келуге ұсынатыны қуантады. Біз отандық және шетелдік туристер үшін жағдай жасау бойынша жұмысты жалғастырамыз",-деп атап өтті вице-министр.