Әлеуметтік желіде ПИНТА мейрамханалар желісінің айналасында жанжал шықты

Әлеуметтік желіде «ПИНТА» мейрамханалар желісі төңірегінде жанжал туындады, онда қазақ тілінде ән айтуға тыйым салынады. «Сіз табыс тауып жүрген мемлекеттің тілі сізге несімен ұнамай қалды», - деп жазады желі қолданушылары.

Сонымен қатар, әлеуметтік желіде «Музыканты Пинта» чат хабарламаларының скрины тарады.

«Қазақша әндерді бұрынғыдай орындамаймыз. Егер тұтынушылар қазақша ән айтуды өтініп немесе талап етіп жатса плей-листте қазақ тілінде әндер жоқ екенін айтыңыздар. Бірден ресторан директорын шақырыңыздар. Қазақша ән айтуға тыйым салынғанын айтпаңыздар», - делінген чат хабарламасында.

Алайда, бұл хабарламаның «ПИНТА» мейрамханасының қызметкерлерінің чатынан шыққандығы туралы нақты дәлел жоқ.

«Пинта –  өзіндік тұжырымдамасы бар мейрамханалар желісі. Мейрамханада тек ағылшын тілінде ән айтылады. Ал орысша әндер сирек кездеседі. Біз барлық қонақтарға қуаныштымыз және мемлекеттік тілге құрметпен қараймыз", - деп жауап берді Instagram әкімшілігі ашуланған пікірлерге.

Кейінірек сол әлеуметтік желіде олар пайдаланушылардың пікірлеріне жауап беруді мүлдем тоқтатты. 
Бірнеше сағаттан кейін әкімшіліктің ресми жауабы пайда болды, онда "ПИНТА" мейрамханалар желісі 1997 жылғы 11 шілдедегі «Қазақстан Республикасының тілдері туралы» заңды сақтайды деп жазылған.

«Қонақпен және қызметкерлермен барлық ішкі және сыртқы байланыс қазақ және орыс тілдерінде жүргізіледі, атап айтқанда: мәзір, жарнамалық материалдар, әлеуметтік желілер және оқыту материалдары. «ПИНТА» мейрамханаларында музыкалық-ойын-сауық бағдарламасы екі тілде де жүргізіледі, Орындаушы музыканттар мен диджейлердің репертуарында танымал тректер, соның ішінде қазақ тілінде де бар. Біздің барлық қонақтарымыз бен әлеуметтік желілердегі жазылушыларымыз сервис пен кері байланысты өздеріне ыңғайлы тілде ала алады», - деп қорытындылады мекеме әкімшілігі.