Қазақстанның алты аймағында электр қуаты өшірілген

"KEGOC" АҚ жағдайға түсініктеме берді: "2023 жылғы 13 ақпанда сағат 09: 23-те технологиялық қорғану әрекетімен 500 кВ Екібастұз – Ағадыр Ж-5170 электр жеткізу желісі авариялық түрде ажыратылды."

Нәтижесінде Алматы, Түркістан қалаларында және Алматы, Жамбыл, Жетісу, Түркістан, Қызылорда, Қарағанды облыстарында жарық сөндірілген.

""KEGOC" АҚ электр желілерінің аварияға қарсы автоматикасы штаттық режимде іске қосылды, соның арқасында Қазақстанның оңтүстік және орталық өңірлерінде толық ажыратуға жол берілмеді", - деп хабарлайды "KEGOC" АҚ.

Бұл жағдайға байланысты Энергетика министрлігі де мәлімдеме жасады:

"Осыған байланысты аварияға қарсы автоматика арқылы Алматы, Жамбыл, Түркістан, Қызылорда, Ұлытау облыстарында, Алматы, Түркістан қалаларында электр энергиясы бойынша шектеулер енгізілді. Зақымдану орнын анықтау үшін «KEGOC» АҚ мамандандырылған бригадасы шықты. Сондай-ақ Жамбыл ГРЭС-ін және Мойнақ ГЭС-ін қосымша жүктеу бойынша шаралар қабылданды", - делінген ведомствоның ресми сайтында.

Қазіргі уақытта ажыратылған тұтынушыларды кезең-кезеңімен қосу жүргізілуде..