Астана қаласының қоршаған ортаны қорғау басқармасының басшысы сыбайлас жемқорлыққа қатысы бар деген күдікке ілінді
Шаруашылық субъектісіне 4,7 млн теңге залал келтірілген, деп хабарлайды «Zerkalo» Антикорға сілтеме жасап.
Ведомство «Астана қаласының Қоршаған ортаны қорғау және табиғатты пайдалану басқармасы» мемлекеттік мекемесінің басшысына қатысты тергеуді аяқтады. Ол қызметтік өкілеттіктерін асыра пайдаланып, кәсіпкерлік субъектісіне 4,7 млн теңге көлемінде залал келтірді деген күдікке ілінді.
Қазір айыпталушының соты жүріп жатыр.
Тергеу мүддесіндегі басқа ақпарат жария етілмейді.
Еске салайық, Конституцияның 77-бабының 3-тармағының 1-тармақшасына және Қылмыстық-процестік кодекстің 19-бабының 1-бөлігіне сәйкес, соттың заңды күшіне енген үкімі бойынша оның қылмыстық құқық бұзушылық жасауға кінәсі анықталғанға дейін әрбір адам кінәсіз деп танылады.
Фото: adyrna.kz