Қарағанды облысында балалардың улануы: медперсонал жұмыстан шеттетілді

Бала құқықтары жөніндегі уәкіл және денсаулық сақтау министрі Қарағанды облысындағы жағдай туралы айтып берді. Қазіргі уақытта уланған балалардың екеуі ауыр жағдайда, деп хабарлайды Zerkalo.

Балалар уланғаннан кейін Қарағанды облысына арнайы комиссия келді. Олардың қатарында денсаулық сақтау министрі Ажар Ғиният және Бала құқықтары жөніндегі уәкіл Динара Закиева бар.

"Қарағанды облысының балаларға арналған арнаулы әлеуметтік қызмет көрсету орталығында 12 баланың улануына байланысты Қарағандыда тұрмын. Өкінішке орай, бір бала қайтыс болды. Ата-анасына көңіл айтамын. Алты бала реанимацияда. Бесеуі клиникалық ауруханада жатыр (Тағы екі бала келді). Олардың арасында жетім балалар да бар.

Қылмыстық іс қозғалды, комиссия құрылды. Улану себептерін анықтау бойынша жұмыстар жүргізілуде", - деді балалар омбудсмені Динара Закиева.

Бас прокуратура балаларға арнаулы медициналық - әлеуметтік қызметтер көрсететін барлық 84 мекемеге кешенді тексеру жүргізетін болады. Олардың 20-сында жетім балалар мен ата-анасының қамқорлығынсыз қалған балалар тұрады.

"Қазір мемлекеттік органдармен бірлесіп балаларға арналған мекемелердің бейнебақылау камераларын ЖБО-ға және жауапты органдарға қосуды пысықтап жатырмыз. Күзде өңірлердегі жұмыс аясында балаларға арналған әрбір мекемені тексеру жоспарланды", - деп нақтылады Динара Закиева.

Оның айтуынша, көптеген жүйелік мәселелер бар. Олардың ішінде:

- мамандарды даярлау сапасын, олардың деңгейін, сондай-ақ жалақыны арттыру мәселесін қарастыру қажеттілігі

- балалардың тамақтану нормативтерін қайта қарау, сондай-ақ талаптарды қатаңдату қажеттілігі. Бейінді Министрлікпен біз де осы мәселелер бойынша жұмыс жүргізетін боламыз.

Өз кезегінде ҚР Денсаулық сақтау министрі Ғиният Қарағанды арнайы қызмет көрсету орталығының алты уланған тәрбиеленушісінің екеуі ауыр жағдайда екенін хабарлады.

"Қалған бесеуінде емделу аясында жағдай қанағаттанарлық. Бес бала әлі дәрігерлердің бақылауында болады. Егер жағдай тұрақты болса, балаларды ертең Орталыққа қайтарады", - деді министр.

Естеріңізге сала кетейік, 1 тамыз күні таңертең Қарағанды облысының балаларына арнаулы әлеуметтік қызмет көрсету орталығында бір бала қайтыс болып, алтауы уланғаннан кейін реанимацияға түскені белгілі болды.