2022 жылы 8 мыңға жуық қазақстандық оңтүстіктен солтүстікке қоныс аударған

Еңбек министрлігі қоныс аударушыларға қандай мемлекеттік қолдау шаралары көрсетілгенін айтты.

2022 жылы "Қуатты өңірлер – ел дамуының драйвері" ұлттық жобасы бойынша елдің оңтүстігінен солтүстігіне өз еркімен 7 923 адам қоныс аударған, оның ішінде 1 320 қандас бар. Еңбек министрлігінің хабарлауынша, оларға мемлекет тарапынан мынадай қолдау көрсетілген:

1) көшуге арналған субсидия – бір мезгілде отағасына және отбасының әрбір мүшесіне 70 АЕК мөлшерінде;

2) отбасы мүшелерінің санына және елді мекенге байланысты 12 ай ішінде 15-тен 30 АЕК-ке дейінгі мөлшерде тұрғын үй жалдауға және коммуналдық қызметтерге ақы төлеуге ай сайынғы субсидиялау;

3) қысқа мерзімді кәсіптік оқытуға жіберу;

4) жұмысқа орналасуға немесе кәсіпкерлік бастаманы дамытуға жәрдемдесу.

2022 жылы қоныс аударушылар ішінде 3 652 адам еңбекке жарамды, ал олардың 2 811-і тұрақты жұмыспен қамтамасыз етілген. Біржолғы субсидиялар 7 622 қатысушыға төленіп, 5 633 азаматқа тұрғын үй шығыстары субсидияланады.

Өңіраралық қоныс аударуға қатысатын кәсіпкерлерге де қаржылық қолдау қарастырылған. Тұрғын үймен қамтамасыз етілген және кемінде 2 жылға тұрақты жұмысқа қабылданған әрбір қызметкер үшін 400 АЕК мөлшерінде жұмысқа орналасуға біржолғы субсидия беріледі.

2023 жылға келетін болсақ, қарастырылған өңірлік квота 8 652 адамды қамтиды. Сондай-ақ, Еңбек министрлігі алдағы жылдарға жаңа жұмыс орындарын құруды және қолданыстағы бизнес-жобалар кеңейтуді жоспарлап отыр.

Сондай-ақ, тұрақты жұмысы бар қоныс аударушыларға 4 млн теңгеге дейін баспана сатып алуға қаржылай көмек алуға мүмкіндік беретін ұтқырлық сертификаттарын енгізу мүмкіндігі қарастырылуда.