Қазақстанда ең төменгі жалақы 2024 жылғы 1 қаңтардан бастап көтеріледі
Бұл туралы президент Қасым-Жомарт Тоқаев Қазақстан халқына Жолдауында айтты, деп хабарлайды Zerkalo.
"Біз уәде еткендей, Үкімет ең төменгі жалақы деңгейін кезең-кезеңімен көтеруді жалғастырады. Азаматтардың табысын арттыру мақсатында 2024 жылғы 1 қаңтардан бастап ең төменгі жалақы мөлшерін 85 мың теңгеге дейін арттыруды тапсырамын. Осылайша, біз үш жыл ішінде ең төменгі жалақы мөлшерін екі есеге көтердік.
Бұл шара 350 мың бюджетшіні қоса алғанда, 1 миллион 800 мыңға жуық азаматтың әл-ауқатына оң әсерін тигізеді. Жалпы, еңбек нарығын жан-жақты дамыту үшін Үкімет қысқа мерзімде 2030 жылға дейін есептелген Кешенді жоспарды бекітуі қажет.
Жаңа экономикалық саясаттың принциптері мен басымдықтарын нақты анықтаудан басқа, жоспарланған реформалардың сапалы және толыққанды орындалуы өте маңызды. Бұл процесс Мемлекеттік қызметшілердің құзыретіне, жауапкершілігіне және саяси еркіне тікелей байланысты", - деп атап өтті Мемлекет басшысы.
Ашық көздерден алынған фотосуреттер