2023 жылы қазақстандық құтқарушылардың жалақысы өседі

Сейсенбі, 14 ақпанда Ақмола облысына жұмыс сапары барысында ел Президенті М.Ғабдуллин атындағы азаматтық қорғау академиясының курсанттарымен кездесті. 

Мемлекет басшысы құтқару қызметінің ерекше маңыздылығына тоқталып, Түркияның зардап шеккен өңірлерінде тер төгіп жатқан ҚР ТЖМ қызметкерлерінің ерен еңбегін атап өтті. Оларға алғысын білдіре отырып, барлық құтқарушылар мен дәрігерлерге елге оралғаннан кейін наградалар табысталатынын айтты.

– Олардың арасында Ақмола облысының мамандары да бар, яғни 18 адам. Біздің құтқарушылар бірнеше адамды аман алып шықты. Түркияда күндіз-түні жұмыс істеп жатқан азаматтарымызға алғыс айтамын! Түркиядан аман-есен оралған соң оларды міндетті түрде марапаттайтын боламыз, – деді Қасым-Жомарт Тоқаев.

Ақорданың хабарлауынша, президенттің тапсырмасы бойынша 2023 жылы құтқарушылардың жалақысын 10-нан 70% - ға дейін арттыру қарастырылған.

Сөз барысында президент Түркияға қосымша гуманитарлық көмек жіберуді тапсырды. Апат аймағына жіберілетін шатырлар, жылытқыштар және жылы киімдер секілді ең қажетті заттар.

Мемлекет басшысы сондай-ақ азаматтық қорғау жүйесін тұрақты жаңғырту қажеттігін атап өтті. Академияның жаңа оқу корпусы мен жатақханасынасына жер телімін бөлуді тапсырды.