Ақтөбеде су тасқыны салдарынан көшелерден 17 мың текше метр су шығарылды.

Қала көшелерінен 17 мың текше метр су сорылды. Бұл туралы  inbusiness.kz. сайты жариялады.

Ақтөбе облысы әкімдігінің мәліметінше, 7 наурыздан бері қала көшелерінен 17 мың текше метрге жуық еріген қардың суы сорылып, 2 шақырым арық-арналар тазартылған.  Қыс басталғалы барлығы 210 мың текше метр қар қала сыртына шығарылған.

Облыс әкімі Ералы Тоғжанов су тасқынымен жұмысының барысымен танысты. Өңір басшысының өзі арнайы барған Шанхай және Мәскеу көшелерінде қарды тазарту, еріген суларды сору жұмыстары тоқтаусыз жүргізіліп жатыр.

Қазір қала көшелерінде 14 мердігер екі ауысымда күшейтілген режимде жұмыс істеп жатыр. 243 техника жұмылдырылған.

Ералы Тоғжанов қаланы аралау барысында жалпы қызметкерлерге қаланы тез әрі сапалы судан тазартуды тапсырды.

Айта кетейік, Ақтөбе қаласында еріген қардың суы салдарынан қала көшелері суға толған болатын. Жаяу жүргіншілер су кешіп, көліктер су толған көшелермен жүруге мәжбүр болды. Қазіргі таңда жағдай қалпына келтіріліп жатыр.