462 техника бірлігі мен 340 жұмысшы: Алматыда қар тазалау жұмыстары жүріп жатыр

Таңға дейін қалаға 15 см қар түскен, ал таулы аудандарға түскен қар биіктігі - 20 см. Қарды тазалауға коммуналдық қызметкерлер түнгі 1.00-ден бастап кірісті, деп хабарлайды Алматы әкімдігінің ресми Telegram-арнасы.

Қар күреу жұмыстарында жол полициясының патрульдік машиналарының қатысуымен 19 баған ұйымдастырылған. Жолдарға көктайғаққа қарсы материалдар себілген.Таңғы сағат 6.00-ге дейін қаладан 390 м3 қар шығарылып, 2380 тонна көктайғаққа қарсы материалдар пайдаланылған.

Түнде тротуарлар, қоғамдық орындар, аялдамалар мен жер үсті өткелдер де қардан тазаланды. Ол үшін 462 техника күші мен 339 жол жұмысшысы жұмылдырылған. Таңертең техника бірлігінің саны 524-ке, ал адам саны 1115-ке жеткен. Аудандық әкімдіктер тәулік бойы қар тазалау жұмыстарын бақылауында ұстайтын болады.

Синоптиктер бүгін, 10 ақпан күні түстен кейін -1...-3 градус аяз, жауын-шашынсыз, ал кешке қар аз болуы мүмкін деп болжайды.

"Жүргізушілерді жылдамдықты төмендетуге, автомобильдер арасындағы қашықтықты арттыруға және өткір маневрлерден аулақ болуға шақырамыз", - делінген әкімдік хабарламасында.